მონიტორინგის და დიალოგის შედეგად ორივე მხარე მოგებულია
2007 წლის შემოდგომაზე ევრაზიის თანამშრომლობის ფონდმა მიზნობრივი გრანტის კონკურსის მეშვეობით ბათუმში დაარსებული “ადამიანის უფლებების დაცვის ცენტრი” დააფინანსა პროექტისათვის “ჩემი ქალაქი – ჩემი ფული”, მონაწილეობითი სამოქალაქო მონიტორინგის მხარდასაჭერად. პროექტის მიზანი იყო გაეზარდა მუნიციპალიტეტის კეთილმოწყობისთვის ბიუჯეტიდან გამოყოფილი თანხის განაწილების გამჭვირვალობა, მონიტორინგის პროცესში ბათუმის ამხანაგობების ასოციაციების, ასევე ადგილობრივი მედიის პროაქტიულად ჩართვის გზით.
პროექტის საწყის ეტაპზე “ადამიანის უფლებების დაცვის ცენტრმა” ძირითადი ტრენინგი გამართა ბიუჯეტის მონიტორინგის საკითხებზე ასოციაციის წევრებისა და ადგილობრივი გაზეთის, ტელევიზიის და რადიოსადგურების ჟურნალისტებისთვის. ტრენინგის შემდეგ “ამხანაგობის ასოციაციების” ათი წამყვანი წევრი ბიუჯეტის მონიტორინგის პროცესში პირდაპირ ჩაერთო. ტრენინგი ასევე დაეხმარა ჟურნალისტებს პროფესიონალურად გაეშუქებინათ საბიუჯეტო საკითხები თავიანთ მედია საშუალებებში, რის შედეგადაც მედიის მიერ საკითხების გაშუქებამ “ამხანაგობის ასოციაციების” ყველა წევრის და ძირითადი საზოგადოებისთვის უზრუნველყო ხელმისაწვდომობა რეგულარულ და ამომწურავ ინფორმაციაზე ბათუმის მერიის მიერ განხორციელებული, მუნიციპალური კეთილმოწყობის დასრულებული და მიმდინარე სამუშაოების შესახებ.
მუნიციპალური კეთილმოწყობის მუდმივმა მონიტორინგმა, ბიუჯეტის რეგულარული განხილვით და ობიექტზე გასვლითი ვიზიტების ჩათვლით, მუნიციპალური კეთილმოწყობის სამსახურის ქვედა დონის თანამშრომლების მხრიდან მთელი რიგი დარღვევები გამოავლინა. აღნიშნული დარღვევები მუნიციპალური კეთილმოწყობის პროგრამას აფერხებდა, რაც ასევე უარყოფითად მოქმედებდა მაცხოვრებლებსა და ამხანაგობებზე. “ადამიანის უფლებების დაცვის ცენტრმა” დაუყოვნებლივ შეატყობინა მუნიციპალური კეთილმოწყობის სამსახურის უფროსს და ბათუმის მერს აღნიშნული დარღვევების შესახებ. მათი ძალისხმევის შედეგად დარღვევები გამოსწორდა. ამას გარდა, ბათუმის საქალაქო საბჭომ სამოქალაქო საზოგადოების ჩართულობის ღირებულება აღიარა და 2009 წლისთვის ამხანაგობების მიზნობრივი პროგრამების განხორციელების მიმოხილვაში სამოქალაქო საზოგადოების ორგანიზაციები ჩართო.
პროექტის განმავლობაში, გრანტის მიმღების დახმარებით, ასევე ახალი ამხანაგობების ასოციაციების შექმნის მხარდაჭერით გაიზარდა მოქალაქეთა ჩართულობა მუნიციპალური კეთილმოწყობის მონიტორინგში. “ადამიანის უფლებების დაცვის ცენტრმა” მუნიციპალური ბიუჯეტის საკითხზე 140 კონსულტაციაზე მეტი, ხოლო იურიდიულ თემაზე კი 90-ზე მეტი კონსულტაცია გასწია ახალი ასოციაციების ჩამოყალიბებასთან დაკავშირებით. მართლაც, ბათუმში გრანტის მიმღების მიერ პროექტის განხორციელების შუა პერიოდში გამართულმა კვლევამ მიუთითა, რომ გამოკითხულთა 79%-ს უნდოდა საბიუჯეტო პროცესებში ყოფილყვნენ ჩართულები.
ინტენსიური მოლაპარაკებების შემდეგ “ადამიანის უფლებების დაცვის ცენტრი” და ბათუმის საქალაქო საბჭო შეთანხმდნენ შეექმნათ მუდმივი ერთობლივი სამუშაო ჯგუფი (სამოქალაქო საზოგადოების ორგანიზაციების, მედიის და საზოგადოების მონაწილეობით), რათა ზედამხედველობა გაეწიათ მუნიციპალური კეთილმოწყობისთვის გამოყოფილი თანხების გახარჯვაზე. აღნიშნული სამუშაო ჯგუფის წევრები საქალაქო საბჭოს შეხვედრებს დაესწრებიან, მონაწილეობას მიიღებენ კომიტეტის შეხვედრებში, მიიღებენ ინფორმაციას მერიიდან და მოამზადებენ საკითხებზე დაფუძნებულ რეკომენდაციებს ადგილობრივი თვითმმართველობისთვის. სამუშაო ჯგუფის შექმნა პროექტის მთავარი წარმატებაა, სადაც დემონსტრირებულია, რომ სათანადოდ დაგეგმილი მონაწილეობითი სამოქალაქო მონიტორინგი, პროაქტიულ მედია კამპანიასთან ერთად, შედეგად მოიტანს მოქალაქეთა ეფექტურ მონაწილეობას გადაწყვეტილების ადგილობრივად მიღების პროცესში.
2010 წლის კონკურსი მცირე გრანტებზე - ”მოქალაქეთა გაძლიერება მათი ინტერესების დაცვითა და მონაწილე
2010 წლის მცირე გრანტების კონკურსში გამარჯვებულთა სია
ღია კარის საგრანტო კონკურსი
2010 წლის საგრანტო კონკურსი
